Baadantoog för Monster High

Ik weet, ik bün mal wedder böös laat. Deiht mi leed!
Nah meist veer Johrn ward ik nu de Anleiten för de Baadantoog hier rinschrieven. Dat Fröhjahr is je nu dor (tominnst op de Kalenner) un dor kann een sik je ook bilütten op de Sommertied vörbereden.

Wat Du bruukst:


Buumwullgoorn vun 8 Fäden (dat is 'n beten wat dicker as dat normale Häkelgoorn)
Sockennadels 2 mm
Häkelnadel 2 mm
Neihgoorn un -nadel
villicht Perlen


Dat Grundmuster is 1 rechts, 1 links.


Un nu geiht't los:


17 Maschen ward anslahn, denn 5 Reegen in't Grundmuster knütt. In de Rüchreegen ward afnahmen, bit bloots noch dree Maschen op de Nadel sünd: jümmers  de eerste twee un de letzten twee Mschen tohopknütten.
Nu dree Reegen ewen rechts knütten. Denn geiht't in't Grundmuster wieder.
In de Rüchreegen nu wedder tonehmen: jümmers achter de eerste un vör de letzte Masche een Masche ut de Dwaarsfaden rechts verdreiht ruutknütten.
5 Reegen in't Grundmuster knütten.
In de Rüchreegen jüst so as vörhen wedder afnehmen, bit dat dat 11 Maschen sünd. Noch 10 Reegen in't Grundmuster knütten.
In de nässten twee Henreegen de eerste un de letzte Masche dubbelt rechts afknütten.
In de nässte Reeg (een Rüchreeg) de eersten twe Maschen afbinnen, 3 Maschen in't Muster knütten, 5 Maschen afbinnen un denn in't Muster bit an't Enn vun  de Reeg.


Du büst nu bi de Dreger:


Twee Maschen afbinnen, un in't Muster de anner dree Maschen knütten. De nässte Reeg de dree Maschen in't Muster knütten, för de letzte Reeg wenden. Nu de eersten twee Maschen afheven, de drüdde Masche knütten un de anner beeden dor övertrecken. Nu is man een Masch öwer, ut de een Luftmaschkett vun 20 Maschen häkeln, Faden dörtrecken un afsnieden.
De anner Dreger maakst jüst so över de anner dree Maschen.


Nu geiht in'n Endspurt:


Dat ünnerste Dreeeck hochklappen un de Sieden tosamenneihen. Treck Dien Monster de Baadantoog an. De Dregers ward achter de Rüüch verkrüüzt, dör de Tonahmen an de Bost trocken, wedder achtern verkrüüzt un tosamenbunnen. Laat dorbi een beten Luft, dat Du de Antoog ook licht utrecken kannst. Wenn Du magst, treckst Du Perlen op de Rest vun de Dregers.

Un nu man los mit Dien Monster, an'n Strand oder an'n Pool!

Een Jumpsuit för Monster

In mien Poppen-WG sünd nu ook een paar Monsters introcken un ook de bruuk Kleedaasch.
Hier een Jumpsuit, de dat dregen deit, is Howleen.

Un so geiht dat:

Du bruukst:
Sockengarn mit 4 Faden un
een Nadelspeel in 2,5.

Toeerst sleiht een 24 Maschen an. Dat ward in Runnen knütt, dat Muster is 1 rechte Masch verdreiht, 1 linke Masch. So geiht dat 24 Runnen. In de 25. Runn ward ut jede Masche twee ruutknütt.
Nu geiht dat ewen mit rechte Maschen wieder. In der 13. Runn ward blots de eersten 24 Maschen knütt, dorbi ward se op dree Nadels opdeelt. Dat maakt 8 Maschen för jede Nadel. Nah de 24. Masch sleiht een noch twee Maschen an. Düsse Runn is de eerste Runn vun't Been. De tweete Runn ward eenfach rechts afknütt. In de 3. Runn knütt een de letzten twee Maschen tohoop, in de 4. Runn de eersten twee. Alltosamen ward 24 Runnen knütt. In de 25. Runn jümmers twee Maschen tohoop knütten. Nu wedder 1 rechte Masch verdreiht, 1 linke Masch knütten. In de 6. Runn aknütten, man nich to fast. De anner Been jüst so maken. Nu noch de Gaarnennen fastneihen un ook dat Lock mang de Been tohoopneihen.
Nu bruukst blots een Monster, de dat lieden mach...

Ik mol wedder!

Jau, leve Lüüd, ik leev noch. Is dat würkli een Jahr her, dat ik wat bloggt hebb? Ohauehaua. Dat geiht je gor nich. Ik will mi bedern, verspraken!
Güstern sünd wi vun Däänmark trüchkamen. Twee Weken Ferien, wat weer dat schön. Un so liesen. Wüllt Ji mol een paar Biller sehen? Dor köönt Ji ook glieks Frankie kennenleern. Se is een Monster High un för ehr un ehr Süstern knütt ik jüst nu de meeste Tied.

Se bruuk een Baadantoog, weer je klor. Un denn wat för de Stadt oder för awends. Ik heff denn een Rock un een Weste knütt.

Dor kunn se nu ook an'n Strand mit, Muscheln un Steen sammeln...

 Dor weer denn ook een Dasch nödig... un keen Fru kümmt mit blots een Dasch ut.

 Un nu: Shoppen in Hvide Sande!

Un bi de ehr Figur kunn se sik ook een grötteres Stück Koken günnen.
Man wi hebben ook in Kultur maakt. Wi weern in't Wikingermuseum in Bork Havn.

Nee, se is nich offert worrn, man bannig intressant weer't.

Dat is de lütte Kark, de ook noch een Klockstapel kregen schall.

Dor geev't ook Wikingerkledaasch to'n Utprobeern, man nich in ehr Grött.

Anners weern wi ook noch in Thyborön, an'n Limfjord.

Un de letzt Utfloog maken wi nach Lyngvig Havn un to de Füürtorn.

In't ole Füürtoornwachterhüüs weer enn Utstelln över de Badetieden vun fröher. De Badeantöög weern je smuck.

Un wat heff ik ehr sünst knütt?

Socken för Harvst un Winter.

Een Dook för avends. De Anleiten dorför is nich vun mi, dat is een lütt Version vun de TGV, de een över Ravelry kregen kann.

Un een Kleed mit Tornüre, wat sik so schön över ehrn Achtersteven opbuuschen deit.

Ik ward de Anleiten för de Baadantoog un Rock un Weste noch instellen, fast toseggt!

Lütt Top mit V-Utsnitt

Moin!
Ik strick je veel Puppensaken, wieldat mien Dochter je ook böös veel Puppen hett. Dormit kunn se glattweg een egen Puppenkinnergoorn opmaken. Klar hett se ook Barbie-Puppen. Un für de is mien eerst Muster, een Top mit V-Utsnitt.

Een bruukt: Nadeln in Grött 2 (US 0) un een dünn Boomwullgaarn. Dat ward tomeist as Häkelgaarn för Filethäkelee verköfft. Een Maschenproov heff ik nich maakt. Nu geiht los:

För dat Vörderdeel ward 28 Maschen anslagen un 4 Regen in 1 rechts, 1 links knütten. Dornah ward glatt rechts wiederstrickt. In de eerste Reeg ward verdeelt söben Maschen tonahmen, so dat 35 Maschen op de Nadels sünd. In de 17. Reeg ward ut de Middelmasch 1 rechts, 1 rechts verdreiht rutstrickt. In de nässte Reeg (een Rückreeg) geiht dat in twee Dele wieder, also bloots 18 Maschen stricken. För de V-Utsnitt ward nu nah de Randmasch 2 Maschen rechts tosamenknütt, 1 Ümslach maakt un 2 Maschen överdragen tosamenknütt. Op de Oort wiest de eerste Afnahm nah rechts, de tweete nah links. De Rückregen ward wieder links knütt, ook de Ümslach. De Afnahmreeg ward sößmal strickt, denn ward in een Hinreeg afknütt. De linke Hälft ward gegengliek strickt, de Afnahmen denn vör de Randmasch in de Midd.
Dat Rüchdeel ward gliekerwies knütt, man nich opdeelt, dorüm ward in Reeg 17 keen Masch tonahmen. Vun Reeg 19 an ward de Hinregen so strickt: 15 Maschen rechts, 2 rechts tosamen, 1 Ümslach, 1 rechts, 1 Ümslach, 2 överdragen tosamen, 15 Maschen rechts. Dat maakt een sößmal, denn ward in een Hinreeg afknütt.
Natt maken, opspannen un dröög warrn laten. Denn ward Vörder- un Rüchdeel tosamenneiht. Man nich de Löcker för de Arms vergeten!
Een kann ook Perlen instricken, wenn een dat mach. Dat kunn denn so utsehn:

Wor ik dat maak mit de Perleninstrickeree, de schall mien nässte Post lesen.
Bit denn: Good Strick!

Moin moin, leve Lüüd!
Na, kiek ens, dor geiht nu mien ersten Blog rut in de digitale Welt.
Wüllt Ji weten, wat ik hier will un keen, to'n Dunnerslach, ik eegentlich bün?
Is ja al good. Fangt wi mit mi sülms an, good? Ik bün: 44 (och, nee, al so oll), kümm ut Hannover (kannst nich hörn, nich?), heff een lütt Dochter (so lütt nu ook wedder nich, de kümmt nässten Maand al to School) un ik strick. As'n Weltmeester. Mien Geld verdeen ik as Daagmudder für lütte Göörn vun Null bit Dree.
Dat schall langen, wat? Un worüm geiht dat denn nu in de Blog?
Ik will hier dat een oder anner plattdüütsch Strickmuster rinsetten, mag also sien, dat ik nich jede Week oder ook jede Maand wat schrieven ward. Nich böös sien, büdde.
Un worüm op Platt? Ja, worüm denn nich?
So, Lüüd, denn töövt mal op dat, wat kamen ward! Bit dorhen, good Strick!